الحبيبين كيفنكم...
واصلنا ونستنا مع البنيات لامن وصلنا اسكريم 41..
وعزمننا الداندورمي... عوض يسكت يتمطق في الداندورمي ويتبسم ويكب في الجلكسات...
انا نسيت داندورمتي وسرحت في الدنيي الماهلي دي...
يعني هسا لو الواحد ظروف اهلو كانت احسن من كدة موش كان ساهل جدا انه الواحد يقول
للبت دي الشي الكاتمو في نفسي وشغال يهري فيهو ليل نهار...
الغريب في الموضوع انه امي (رحمها الله) حاسابي ودايما تقولي: يا ولدي الدنيي دي شن طعمها
ما تسوالا شي والله دة كريم قاعد يدي الجني دحين انت تم قرايتك والله بيديك الفي مرادك...
وحاتكم يا الزينين اتلفت شفت في وش البنيي... البت دي لامن تحدر عينها وتشوف فيني من تحت تحت
وبياض عيونها يبقى اكبر من السواد زي ملاح النعيميي المضرضرلهم فيهو فلفل اسود في طرفو
احس بي روحي دي عايزة تمرق ضُمة ضُمة... ونفسي يتخمة...
والعجب وكتين تعضعض في شفايفها بي سنونها البيض ديك بس طرف قراصي متمري بين
صحنين ألات صيني بُيُض... اصلو قلبي ينتلو في جنس نتلي علي المتري (طرمبة الموية)...
والعجب وكتين تضحك ويظهر لسانها ولهاتا... يمين بالله خُشافايي في كورية جلي...
المغسي تركبني من راسي لي رجلي وقلبي يقولي امسكها من ايدها واعوعي وقلها وحات الله بريدك...
- دكتور طارق مشيت وين...
- ابدا والله بس بفكر في الدنيا العجيبة دي..
- ليه عجيبة...
- الصدفة العرفنة فيها بعض كانت كلها عجيبة مع انه نحن تلاتة يوم شغالين عندكم وما شفناكم
يعني كان ما شلاقة عوض ما كنا عرفناكم ولا هسا قاعدين معاكم... ولا حتى نحلم بي كدة...
- ندمان انك عرفتنا ولا شنو...
- عيب عليك ياخي تقولي كدة... بس انتو ممكن تكونوا ندمانيين... نحن لا
- منو القاليك... عليك الله شوف في عيون جكس عوض دة وهي بتتكلم معاهو...
موش بتحس بانها كأنو الدنيا دي كلها حقتها هي براها...
- تعرفي أنا دايما بسأل عوض إنه اختك دي شايفة شنو سمح فيهو... يعني نحن ناس على باب الله...
- انت بتقيس الحاجات بالقروش بس... يعني حتى المشاعر بقت عندها تمن..
- لا انا ما قصدت كدة لكن انا صراحة ما شايف حاجة بتميزنا عن باقي الشباب ويمكن نكون ما عندنا
مؤهلات في مجتمعكم دة كله كله... يعني لو في ميزة صغيرة إننا ضاربين الهم بالفرح ودي الدنيا كلها عندها...
- بس يا سيدي قلب اختي انا من الدنيا دي كلها ما حب غير عوض الانت شايفوا دة
- هو قاعد يقول يضع سره في أضعف خلقه... وانا ما شايفلي سر عندو
- انت في حاجات كتيرة ما شايفها... متشائم بي شكل غريب خلاص
- ما عندي حل غير اتشاءم... وانا لي هسة ما مقتنع انه عوض ممكن يتزوج اختك وشايف انه مشوارو طويل جدا
وما اظن اهلك حا يقدروا يصبروا عليه خصوصا ود عمك كان جاهز تقريبا وما ناقصوا حاجة.
- المهم انه اختي عايزاهو ودة حقها...
- اقول ليك حاجة عوض ما حا يتزوج اختك دي موش لانه ما عايزها... بالعكس هو بموت فيها بس الظروف كلها شغالة
ضده... وضعوا في البيت وحاجة اهلو ليهو وحكاية اعمامك دي ما مطمنة...
- والله يا دكتو طارق انا برضو ما مطمئنة وحاسة انه في حاجة شغالة من ورانا كلنا بين بابا واعمامي وخالتي يوم
قالت لي الله يستر... لانه راجلها قال ليها بابا اتكلم معاهو في الموضوع دة وشكله عايز يتحجج علي عوض بالوقت
مع انه راجل خالتي رايه انه عوض زول كويس والبت عايزاهو لكن انا عندي اعمام صعبين شديد ومسيطرين علي بابا
- يعني عوض تخوفه في محله
- اكيد بس انا قدام اختي ما قاعدة اقول كدة لانه خايفة عليها شديد... وماما مقلقة شديد من الموضوع دة
ونحن طالعين قبيل بابا قال لي اختي كلمي عوض انا عايز اشوفو ضروري يوم الجمعة يجي بدري شوية
وطبعا اختي مفتكراهو موضوع عادي بس انا من لهجة كلامو ما مرتاحة... لكن اقول ليك حاجة... انا خايفة
خوف شديد خلاص...
- بعد دة كله ما عايزاني اتشاءم...
- العايز ليه حاجة بيسعى عشانها ولا شنو يا دكتور...
- دة كلام صاح... بس لمن تكون متأكد إنه الحاجة دي ما حا تصلها... مقاديفك كلها بتقيف...
- انت حاول وبتصل...
حسيت البنية بتدردق فيني عديل كدة وعايزاني اقع بي لساني... لكن وين... مافي طريقة...
اهضرب كدة جواي واتحرق اخير من بعدين اقعد اعوعي قدام الناس واقعد افتفت وانبرش...
- جكس عوض: يا دكترة شنو ياخي قاطع مننا ياخي ادينا حنك حنكين...
اديك حنك انا... هي اختك دي خلت فيني حنك ما وقع من زمان.... ان شاء الله انقصة انا..
- يا ستي انت فاضية من عوض عشان تسمعي حنكنا...
ساقتني من يدي ومشينا قدام سحر وعوض وسبقناهم...
- ياخي انت عايز تنطق متين ياخي حرام عليك
- انطق اقول شنو وانا مبلم كدي...
- طارق جبريل انا قريت جواباتك كلها... يمين بالله اي زول يفهم منها انك بتريد سحر
- اقول ليك شنو... اها انا لو قلت ليها بريدك وما حصل نصيب اقبل وين...
اقع البحر... ولا اقول لي ابوي اطلع فيني بالقندران دة فجخني...
- (تضحك) ما للدرجة دي يا دكترة... بس انت قح ونحن بنكمل الباقي...
- اقح وين... هو انا صدري فضل فيهو هواء...
- (تضحك) مليان شنو يا ربي....
- يا زولة هووووي خطيبك ياهو داك امشي عليه انت المسلطك علي منو..
- خلاص بننتظرك مع عوض يوم الجمعة اوكي...
- ربك يسهل
ودعنا البنيات ومشينا علي امتدادنا نشوانين...
ومن غبانا نسينا انه بعد شارع 61 مفروض نمشي بالجهة التانية من الشارع عشان كتيبة الجيش...
وبس نصلكم جنب باب الكتيبة ونسمعلكم: ثاااااااااااااااااااااااااااااااااااااااااااااااااااابت
عوض من الخلعة انبطح في الواطة كله كله... وانا عيوني بقن يشوفن يمين بس زي الزول العنده قطيعة...
ورجليني يرجفن علي ملاية العنقريب وكتين يكون ضاربها الهنبريب...
وبي شوية صوت مبحوح كدي قلت لي عوض: خلاص رشانا... لحقنا أمات طه...
.... ونواصل
الرئيسية 